2Ch 29 | ZomZIV | STEP | Hezekiah kumpi a suahin kum sawmnih le nga pha a, Jerusalem ah kum sawmnih le kua sung a uk hi. A nu min Abijah hi a, Zechariah tanu ahi hi.

2 Chronicles 29

Hezekiah in Biakinnpi Siansuah

1 Hezekiah kumpi a suahin kum sawmnih le nga pha a, Jerusalem ah kum sawmnih le kua sung a uk hi. A nu min Abijah hi a, Zechariah tanu ahi hi. 2 A pa David sepsa bang tektekin TOPA mitmuh ah amaanin a gamta hi. ^a

3 Ama uk a kum masa a kha masapen sungin amah in TOPA biakinnpi kongpite hongin tuate a puah hi. 4 Amah in siampite le Levi-te paipih a, nisuahna-lam pang tunga mun-awng ah kikhawmsakin, 5 “Levi-te aw, ka thugen na ngai un! Tu-in no le no ki-ap unla TOPA na pate uh Pasian biakinnpi ap un. Biakbuk panin a ninsak na khempeuh hemkhiamang un. 6 I pate a muanhuai kei uh hi; amaute in TOPA eite Pasian muhna ah a sia-in gamta uh a, amah a nusia uh hi. Amaute in TOPA tenna mun lehngatsan uh a, amah a nungngat uh hi. 7 Amaute in inn mailiim kongpite khakin meivakte sumit uh hi. Amaute in munsiangtho ah, Israel Pasian tungah gimnamtui hal loin meihal biakna khatpeuh a pia kei uh hi. 8 Tua ahi ciangin Judah le Jerusalem tungah TOPA hehna tunga; nomau mit-a na muh theih bangun amah in amaute kihtakna, launa tawh thusimlohna thuakin na a semsak hi. 9 Hih thu hang mah in i pate namsau-in si uh a, hih hang mahin i tanute, i tapate le i zite sal-in kikai hi. 10 Tu-in ama hehluatna eite tung pan a ven theih nadingin TOPA Israel Pasian tawh thukhun bawl ka sawm hi. 11 Ka tapate aw, TOPA in note ama mai-ah dingin a nasem ding, ama mai-ah biakna na semin gimnamtui hal dingin hong teel khin ahi manin thusim loin om kei un,” a ci hi. ^b

12 Tua ciangin Levi-te nasep a seh hi: ^c

Kohath panin,
Amasai tapa Mahath le Azariah tapa Joel;
Merari-te panin,
Abdi tapa Kish le Jehallelel tapa Azariah;
Gershon-te panin,
Zimmah tapa Joah le Joah tapa Eden;
13 Elizaphan suante panin,
Shimri le Jeiel;
Asaph suante panin, ^d
Zechariah le Mattaniah;
14 Heman suante panin,
Jehiel le Shimei;
Jeduthun suante panin,
Shemaiah le Uzziel.

15 Amaute in a sanggamte uh khawm uh a, kumpipa thupiak bangin TOPA kammal tawh kizui-in amau le amau kisiansuah uh a, TOPA biakinnpi puahsiang dingin a sungah a lut uh hi. 16 TOPA mun siangtho puahsiang dingin a sungah siampite a lut uh hi. Amaute in TOPA biakinnpi sungah a nin a muh peuhmah uh TOPA biakinn tualah a puakhia uh hi. Levi-te in la uh a Kidron Kuam ah a puakhia uh hi. 17 Amaute in a kha masa a ni masapen ni-in a ap kipan uh a, tua kha a ni giatna ni-in TOPA inn mailiim a tun uh hi. TOPA biakinnpi mahmah nigiat sung ap beh lai uh a, a kha masa a ni sawm le gukna ni-in a zo uh hi.

18 Tua ciangin amaute Kumpi Hezekiah kiangah tumin: “Kote in TOPA biakinnpi bup, meihal biakna-tau le a vanzat khempeuh, anlum apsa luikhiatna sabuai-a vanzat khempeuh tawh ka puahsiang khin uh hi. 19 Kumpi Ahaz in kumpi a sep sunga a muanhuai lohna hangin a phelkhiat na khempeuh puahpha in ka ap khin uh hi. Tuate tu-in TOPA biakna-tau mai-ah a om hi,” ci-in a zasak uh hi. ^e

20 A zingciang zingtungin Kumpi Hezekiah in khuapi uliante kikhawmsak a, TOPA biakinnpi ah a paito uh hi. 21 Amaute in kumpi-gam ading, siangtho mun le Judah adingin mawhna hanga biakna-in bawngtal sagih, tuutal sagih tuuno apa sagih le keel apa sagih a keng uh hi. Kumpipa in Aaron suan siampite in hihte TOPA biakna-tau ah a lui dingun thu a pia hi. 22 Tua ciangin amaute in bawngtalte go uh a, siampite in a sisan la-in biakna-tau tung a theh uh hi; tua zomah tuutalte go uh a, a sisan biakna-tau tung a theh uh hi. 23 Kumpipa le a kikhawm mipite mai-ah mawhna hanga biakna keelte paipih uh a, amaute in tuate tungah a khut uh a nga uh hi. 24 Tua ciangin siampite in tua keelte go uh a, kumpipa in Israel khempeuh adingin meihal biakna le mawhna hanga biakna-a piak dingin thu pia khin ahi manin Israel khempeuh aitangin mawhna hanga biakna-in biakna-tau tungah tuate sisan a theh uh hi.

25 Amah in David le kumpipa’ thumupa Gad le kamsangpa Nathan sehsa bangin TOPA biakinnpi sungah daltuahte, harp-te, lyre-te tawh TOPA thupiaksa bangin Levi-te a omsak hi; hih pen TOPA in ama kamsangte tawna a thupiak ahi hi. 26 Tua ciangin David’ tumtheihte tawh Levi-te dingin siampite a pengkulte uh tawh a ding uh hi.

27 Hezekiah in biakna-tau tungah meihal biakna piak ding thu a pia hi. Biakna piak a kipat ciangin TOPA tunga lasak zong kipan a, pengkulte le Israel kumpipa David’ tumtheihte in zong a sakpih uh hi. 28 Lasate in la sa-a, pengkul a kimut laiteng a kikhawm mi buppi in bia-in a kun uh hi. Meihal biakna a mansiang mateng hihte khempeuh a kizom den hi.

29 Biaknate a man ciangin amah tawh a omkhawm peuhmah khukdin-in a bia uh hi. 30 Kumpipa Hezekiah le a uliante in, Levi-te in David le thumupa Ashap kammalte in TOPA a phat dingun thu a pia uh hi. Tua ciangin amaute in kipaktakin phatna late sa uh a, a lu uh kunin a bia uh hi. ^f

31 Tua ciangin Hezekiah in, “Tu-in TOPA tungah no le no na ki-ap khin uh hi. Hong pai unla TOPA biakinnpi ah biakpiakna le lungdam kohna biaknate hong puak un,” a ci hi. Tua ciangin a kikhawm mihonpi in biakpiaknate le lungdamkoh biaknate puak uh a, a lungsim ua utna a neite in meihal biaknate a puak uh hi. ^g

32 A kikhawm mihonpi in a puak uh meihal biaknate: bawngtal sawm sagih, tuutal zakhat le tuuno a pa zanih pha a - a vekpi in TOPA tungah meihal biakna ding ahi hi. 33 Biakna-a kipia a ki-ap ganhing peuhmah a gawmin bawngtal zaguk le tuu le keel tulthum ahi hi. 34 Tua hi-a meihal biaknate a vun hawk dingin siampite a tawmlua uh hi; tua ahi ciangin a nasep uh a man mateng uh siampi dangte a ki-ap khit matengun amau sanggam Levi-te in amaute a huh uh hi, ahang in, siampite hih sangin amau le amau ki-apna ah Levi-te a ngentelzaw uh hi. 35 Meihal biakna a tamluat banah kilawmtakna biakna ^{▼▼29.35 Tang ngeina-in kilemna biakna} thaute le meihal biaknate tawh a kipiakhawm dawntheih-a biaknate zong hi lai hi. ⁱ

Tua bangin TOPA biakinnpi a biakna nasepte a kikipsak kik hi. 36 Hih bangin manlangtaka kihih ahi manin Pasian in a mite adingin hih bang a piansaknate hangin Hezekiah le mipi khempeuh a lungdam uh hi.